మెగాస్టార్ చిరంజీవి ప్రస్తుతం నటిస్తోన్న సినిమా ఆచార్య. ఈ సినిమా టైటిల్ ను మెగాస్టార్ అనుకోకుండా చెప్పినప్పటి నుండి ఇది జనాల్లోకి బలంగా వెళ్ళింది. కొరటాల శివ దర్శకత్వంలో ప్రస్తుతం షూటింగ్ శరవేగంగా సాగుతోంది. ఈ సినిమా షూటింగ్ ను జూన్ కల్లా పూర్తి చేసి ఆగష్టులో చిత్రాన్ని విడుదల చేయాలని భావిస్తున్నారు.
ఆచార్య విషయంలో జనాల్లో ఇప్పటికే పలు రూమర్లు ఉన్నాయి. ఈ సినిమా దేవాలయాల్లో జరిగే అవినీతికి వ్యతిరేకంగా ఒక వ్యక్తి సాగించే పోరాటమని తెలుస్తోంది. మరోసారి కొరటాల శివ సోషల్ మెసేజ్ తో వస్తున్నాడని దీన్ని బట్టి అర్ధమవుతోంది. అయితే తాజాగా ఈ చిత్రం గురించి మరో విశేషం బయటపడింది. చిత్ర యూనిట్ కు క్లోజ్ అయిన వర్గాలు చెప్పిన సమాచారం ప్రకారం ఈ చిత్రం 90ల బ్యాక్ డ్రాప్ లో జరుగుతుందిట. కథ మొత్తం 1990ల కాలం నాటి పరిస్థితులకు తగ్గట్లుగా ఉంటుందని తెలుస్తోంది. అప్పటి కాలానికి తగ్గట్లుగా ఎక్కడికక్కడ సెట్స్ కూడా వేస్తున్నారట. అందుకే షూటింగ్ అనుకున్నదాని కన్నా ఆలశ్యమవుతున్నట్లు సమాచారం.
ఇటీవలే లీకైన పిక్స్ లో కూడా చిరంజీవి అప్పటి కాలానికి తగ్గట్లుగా లుక్ లోనే దర్శనమిచ్చిన సంగతి గుర్తుండే ఉంటుంది. ఇక ఈ చిత్రంలో స్పెషల్ రోల్ గురించి సస్పెన్స్ అలాగే కొనసాగుతోంది. రామ్ చరణ్ కాకుండా ఈ సినిమాలో మహేష్ బాబు ఆ పాత్రలో నటించనున్నాడని తెలుస్తోంది. ముందుగా నక్సలైట్ పాత్ర అనుకున్నా మహేష్ వచ్చి చేరడంతో దాన్ని స్టూడెంట్ లీడర్ పాత్రగా మార్చినట్లు సమాచారం. మరి దీనిపై కూడా అధికారిక ప్రకటన త్వరలోనే వస్తుందంటున్నారు.
ఉగాది సందర్భంగా ఈ చిత్ర ఫస్ట్ లుక్ తో పాటు టైటిల్ ను అఫీషియల్ గా అనౌన్స్ చేస్తారు. త్రిష ఈ సినిమాలో కథానాయికగా నటిస్తోన్న విషయం తెల్సిందే. ఈ వారమే ఆమె సెట్స్ లో పాల్గొంటుంది. మణిశర్మ ఈ చిత్రానికి సంగీతం అందిస్తున్నారు. ఒక ప్రత్యేక పాత్రలో రెజీనా మెగాస్టార్ సరసన ఆడిపాడింది.