బిగ్బాస్ సీజన్ 4పై చర్చ జరుగుతున్న వేళ బీబీ అంటూ ఇన్ స్టా వేదికగా కన్ఫ్యూజ్ చేసిన నటుడు నందు మొత్తానికి షాకిచ్చాడు. బీబీ అంటే బిగ్ బాస్ కాదని `బొమ్మ బ్లాక్ బస్టర్` అని క్లారిటీ ఇచ్చాడు. `డార్లింగ్స్ నేను బీబీలో వున్నాను. బీబీలో మన రచ్చ మమూలుగా వుండదు. మీకు మరింత వినోదాన్ని అందించబోతున్నాం. ఇందుకు మీ సహకారం కావాలి. అయితే రేపు సాయంత్రం 6 గంటలకు మరో అప్డేట్ రెడీగా వుంది. మళ్లీ ఇక్కడే కలుద్దాం` అని కన్ఫ్యూజ్ చేసిన నందు మొత్తానికి క్లారిటీ ఇచ్చాడు.
బీబీ అంటే తను నటిస్తున్న తాజా చిత్రం టైటిల్ `బొమ్మ బ్లాక్ బస్టర్` అని రివీల్ చేశాడు. నందు హీరోగా నటిస్తున్న చిత్రమిది. హాట్ యాంకర్ రష్మీ గౌతమ్ హీరోయిన్గా నటిస్తోంది. విజయీభవ ఆర్ట్స్ బ్యానర్పై ప్రవీణ్ పగడాల, బోస్ నిడిమోలు, ఆనంద్రెడ్డి మడ్డి, మనోహర్రెడ్డి ఈడా ఈ చిత్రాన్ని నిర్మిస్తున్నారు. రాజ్ విరాఠ్ దర్శకత్వం వహిస్తున్నారు. ఈ చిత్ర టైటిల్ లుక్, మోషన్ పోస్టర్ని చిత్ర బృందం రిలీజ్ చేసింది.
గతంతో పోలిస్తే హీరోగా నందు మళ్లీ స్పీడు పెంచారు. సవారి వంటి చిత్రంతో అదృష్టాన్ని పరీక్షించుకోవాలని ప్రయత్నించినా ఫలితం దక్కలేదు. తాజాగా `బొమ్మ బ్లాక్ బస్టర్` సినిమాపై నందు భారీ అంచనాలు పెట్టుకున్నారట. రష్మీగౌతమ్ నటిస్తున్న సినిమా కావడం, విభిన్నమైన నేపథ్యంలో రూపొందుతున్న ఇనిమా కావడంతో ఈ చిత్రం ఖచ్చితంగా నందుకు మంచి బ్రేక్ని ఇవ్వడం ఖాయం అని చెబుతున్నారు.