టెర్ర‌రిజ‌మ్ పేరు చెప్ప‌గానే వినిపించే మ‌రో పేరు స్లీపర్ సెల్స్. ఎలాంటి యాక్టివిటీని నిర్వ‌హించ‌కుండా అద‌నుకోసం టెర్ర‌రిస్టులు వాడే ప్ర‌మాద‌క‌ర వ్య‌క్తులే ఈ స్లీపర్ సెల్స్. విజయ్ హీరోగా ఏ.ఆర్‌. మురుగ‌దాస్ తెర‌కెక్కించిన `తుపాకి` చిత్రంలో స్లీపర్ సెల్స్ గురించి వారి యాక్టివిటీ గురించి చాలా స్పష్టంగా వెల్ల‌డించిన విష‌యం తెలిసిందే. ఇప్పుడు ఇదే త‌ర‌హా పాత్ర‌లో అక్కినేని వారి కోడ‌లు, స్టార్ హీరోయిన్ స‌మంత క‌నిపించ‌బోతోంది.
రాజ్. ఎన్‌.డీకే తెర‌కెక్కించిన సంచ‌ల‌న వెబ్ సిరీస్ `ఫ్యామిలీ మ్యాన్`. పాకిస్థానీ టెర్ర‌రిజ‌మ్ నేప‌థ్యంలో రూపొందించిన ఈ వెబ్ సిరీస్ సంచ‌ల‌నం సృష్టించింది. వాస్త‌విక కోణంలో రాజ్ ఎన్‌. డీకే ఈ వెబ్ సిరీస్‌ని అత్యంత స‌హ‌జ సిద్ధంగా తెర‌కెక్కించ‌డంతో వీరిపై స‌ర్వ‌త్రా ప్ర‌శంస‌ల వ‌ర్షం కురిసింది. మ‌నోజ్ బాజ్‌పాయ్‌, ప్రియ‌మ‌ణి, క‌న్న‌డ న‌టుడు కిషోర్ ప్ర‌ధాన పాత్ర‌ల్లో న‌టించిన ఈ వెబ్ సిరీస్‌కి ప్ర‌స్తుతం సీక్వెల్‌గా `ఫ్యామిలీ మ్యాన్ 2`ని రూపొందిస్తున్నారు.
ఇందులో స‌మంత కీల‌క పాత్ర‌లో క‌నిపించ‌నుంది. పాకిస్థానీ టెర్ర‌రిస్టుగా ఇండియాలో వారికి అనుకూలంగా ప‌నిచేసే స్లీపర్ సెల్‌గా ఆమె పాత్ర చాలా భిన్నంగా, షాకింగ్‌గా వుంటుంద‌ని తెలిసింది. స‌మంత తొలిసారి నెగెటివ్ పాత్ర‌లో న‌టిస్తున్న తొలి వెబ్ సిరీస్ కావ‌డంతో `ఫ్యామిలీ మ్యాన్ 2` క్రేజీ ప్రాజెక్ట్‌గా మారింది. ప్ర‌స్తుతం స‌మంత త‌న పాత్ర‌కు సంబంధించిన డ‌బ్బింగ్‌ని పూర్తి చేసే ప‌నిలో వుంద‌ట. అన్ని కార్య‌క్ర‌మాలు పూర్తి చేసి పార్ట్ 2ని ఆమెజాన్ ప్రైమ్‌లో రిలీజ్ చేయ‌బోతున్నారు.