రష్మిక మందన్న.. ఇప్పటిదాకా మిడ్ రేంజ్ హీరోలతోనే చేసుండొచ్చు కానీ ఆమెకున్న ఫాలోయింగ్ కథ వేరు. చేసినవి దాదాపుగా అన్నీ హిట్ సినిమాలే. తెలుగులో ఛలో సినిమాతో ఇండస్ట్రీలోకి అడుగుపెట్టిన రష్మిక, తర్వాత గీత గోవిందం బ్లాక్ బస్టర్ తో ఆమె రేంజ్ మారిపోయింది. ఇక్కడ టాప్ మోస్ట్ సెర్చ్డ్ సెలెబ్రెటీగా అవతరించింది. అయితే దేవదాస్ ఓ మోస్తరుగా ఆడినా మళ్ళీ విజయ్ దేవరకొండతో చేసిన డియర్ కామ్రేడ్ సినిమా నిరుత్సాహపరిచినా రష్మిక క్రేజ్ ఇక్కడ ఏ మాత్రం తగ్గలేదు. పైగా రష్మికకు కన్నడలో కూడా క్రేజ్ ఎక్కువే. వారు కూడా ఆమె నటించే తెలుగు సినిమాలపై ఆసక్తి ప్రదర్శిస్తుంటారు.
రష్మికకు తొలిసారి టాప్ తెలుగు హీరో మహేష్ బాబుతో సరిలేరు నీకెవ్వరు సినిమాలో అవకాశమొచ్చింది. దాని తర్వాత రష్మిక ఇప్పుడు టాలీవుడ్ అత్యంత క్రేజ్ ఉన్న హీరోయిన్. నితిన్ సరసన భీష్మ చేస్తోన్న రష్మిక, అల్లు అర్జున్ – సుకుమార్ సినిమాలో కూడా హీరోయిన్ గా ఎంపికైంది. మరిన్ని ప్రాజెక్టులు లైన్లో ఉన్నాయి. ఇలాంటి క్రేజ్ ఉన్న రష్మికను సరిలేరు టీమ్ సరిగ్గా పట్టించుకోవట్లేదు అన్న వాదన ఈ మధ్య బాగా బలపడింది. రష్మిక మందన్నను సరిలేరు నీకెవ్వరు ప్రమోషనల్ మెటీరియల్ లో ఎక్కడా చోటివ్వకపోవడమే దీనికి ప్రధాన కారణం. సరిలేరు నీకెవ్వరు టీజర్ లో ఆమెకు చోటివ్వలేదు. మిగతా నటులందరినీ పరిచయం చేసి, రష్మికకు సంబంధించిన ఒక్క షాట్ కూడా పెట్టకపోవడం ఏమిటని రష్మిక ఫ్యాన్స్ గుస్సా అయ్యారు కూడా. కనీసం ఇప్పటిదాకా విడుదలైన రెండు పాటల్లో కూడా ఎక్కడా రష్మిక ఊసే లేదు. దీంతో రష్మిక ఫ్యాన్స్ బాహాటంగానే ట్విట్టర్ లో తమ అసంతృప్తిని వ్యక్తం చేసారు.
అయితే రష్మిక ఇప్పటికి టీమ్ కు గుర్తొచ్చిందో లేక ట్విట్టర్ లో ఈ అసంతృప్తిని గమనించారో కానీ మొత్తానికి రష్మికకు సంబంధించిన రెండు పోస్టర్లు విడుదల చేసారు. అయితే రష్మిక, మహేష్ మధ్య ఒక రొమాంటిక్ విజువల్ ఏదైనా విడుదల చేస్తారు అని ఆశించిన ఫ్యాన్స్ ఇప్పుడు పోస్టర్స్ తో సరిపెట్టడంతో మళ్ళీ అసంతృప్తిగానే ఉన్నారు. మరి సరిలేరు నీకెవ్వరు టీమ్ ఆ దిశగా ఏమైనా ఆలోచిస్తోందా? అన్నట్లు వచ్చే సోమవారం విడుదలయ్యే పాట రొమాంటిక్ డ్యూయట్ అంట. సో కచ్చితంగా, మహేష్, రష్మికకు సంబంధించిన మరిన్ని స్టిల్స్ బయటకు వస్తాయి.