స్టార్ హీరో అల్లు అర్జున్ కథానాయికుడిగా నటిస్తున్న చిత్రం `అల వైకుంఠపురములో`. మాటల మాంత్రికుడు త్రివిక్రమ్ అత్యంత ప్రతిష్టాత్మకంగా ఈ చిత్రాన్ని తెరకెక్కిస్తున్నారు. పూజా హెగ్డే, నివేదా పేతురాజ్ కథానాయికలుగా నటిస్తున్నారు. యంగ్ హీరో సుశాంత్ కీలక పాత్రలో కనిపించనున్నారు. ఈ సంక్రాంతి బరిలో ఈ నెల 12న రిలీజ్ అవుతున్న ఈ చి త్రంపై సర్వత్రా అంచనాలు నెలకొన్నాయి. ఆ అంచనాలకు ఏమాత్రం తీసిపోని స్థాయిలో సినిమా వుండబోతోందని ల్యాబ్ రిపోర్ట్ చెబుతోంది.
ఇటీవలే సెన్సార్ కూడా పూర్తి చేసుకున్న ఈ చిత్ర మేకింగ్ వీడియోని చిత్ర బృందం శుక్రవారం విడుదల చేసింది. ఈ సినిమాకు సంబంధించిన సీన్లకు ముందు నటీనటులకు దర్శకుడు సూచనలు ఇస్తున్న తీరుతో పాటు సెట్లో అల్ల అర్జున్ నటించిన దృశ్యాలు కూడా ఆకట్టుకుంటున్నాయి. అయితే ఈ సెట్లో స్టైలిష్ స్టార్ అల్లు అర్జున్ తనయుడు అల్లు అయాన్ చేసిన హంగామా మామూలుగా లేదు. కెమెరామెన్ స్థానంలో కూర్చుని అల్లు అయాన్ చూస్తున్న వీడియో అలరిస్తోంది.
అయితే ఇదే సమయంలో కెమెరామెన్ చైర్ నుంచి రారా అని బన్నీ పిలిస్తే `అయామ్ ది ప్రొడ్యూసర్ ఆఫ్ ది ఫిల్మ్` అని అయాన్ చెప్పడంతో సెట్లో వున్న వాళ్లంతా గొల్లున నవ్వేశారు. ప్రస్తుతం ఈ వీడియో నెట్టింట్లో సందడి చేస్తోంది. అల్లు అయాన్ తీరు చూసిన వాళ్లంతా `అయాన్.. యూ ఆర్ రాకింగ్` అంటూ కామెంట్లు పెడుతున్నారు.