తన కెరీర్ లో ఇన్నాళ్లూ సాఫ్ట్ సినిమాలే చేస్తూ వచ్చిన టాలెంటెడ్ ఫిల్మ్ మేకర్ మోహన్ కృష్ణ ఇంద్రగంటి ఈసారి సరికొత్త టేకింగ్ తో మన ముందుకు రానున్నట్లు తెలుస్తోంది. V అనే టైటిల్ తో తెరకెక్కుతున్న ఈ చిత్రంలో నాని, సుధీర్ బాబు నటిస్తున్నారు. నాని తొలిసారి పూర్తి స్థాయి విలన్ పాత్రలో నటిస్తోన్న చిత్రమిదే. మోహన్ కృష్ణ దర్శకత్వంలోనే వచ్చిన జెంటిల్ మ్యాన్ లో నాని నెగటివ్ షేడ్స్ ఉన్న పాత్ర చేసినా తర్వాత అది మంచి పాత్రే అని తేలిపోతుంది. అయితే ఈసారి నాని రాక్షసుడిగా కనిపించబోతున్నట్లు సమాచారం. రాక్షసుడు ఉన్నప్పుడు రక్షకుడు కూడా ఉండాలిగా. అప్పుడేగా బ్యాలెన్సింగ్ అవుతుంది.
రక్షకుడి పాత్రలో సుధీర్ బాబు నటిస్తున్నాడు. ఈరోజు V లో రక్షకుడిగా నటిస్తోన్న సుధీర్ బాబు ఫస్ట్ లుక్ ను రివీల్ చేసారు. సుధీర్ బాబు లుక్ ఈ చిత్రంలో అదిరిపోయిందని చెప్పాలి. గన్ పట్టుకుని టెరిఫిక్ గా ఉన్న సుధీర్ బాబు లుక్ సినిమాపై ఆసక్తిని పెంచింది. “తప్పు జరిగితే యముడొస్తాడనేది నమ్మకం.. వీడొస్తాడనేది మాత్రం నిజం”.. సుధీర్ బాబు క్యారెక్టర్ ను డిఫైన్ చేయగలిగే లైన్ తో ఫస్ట్ లుక్ ను రివీల్ చేసారు.
రేపు రాక్షసుడుగా నటిస్తోన్న నాని లుక్ ను రివీల్ చేయబోతున్నారు. దానిపై ప్రేక్షకులు మరింత ఆసక్తిగా ఉంటారనడంలో ఎటువంటి సందేహం లేదు. మరి దాన్ని V టీమ్ ఎలా ప్రెజంట్ చేస్తుందనేది చూడాలి. దిల్ రాజు నిర్మిస్తోన్న ఈ సినిమా ఉగాది కానుకగా మార్చ్ 25న విడుదల కానుంది. ఇటీవలే షూటింగ్ ముగించుకున్న ఈ చిత్రం ప్రస్తుతం పోస్ట్ ప్రొడక్షన్ కార్యక్రమాల్లో బిజీగా ఉంది. అమిత్ త్రివేది ఈ చిత్రానికి సంగీతం అందించాడు. అలాగే ఈ సినిమాలో హీరోయిన్లుగా నివేతా థామస్, అదితి రావు నటించారు. ఈ చిత్రానికి సంబంధించిన మరిన్ని వివరాలు త్వరలోనే తెలియనున్నాయి. V టైటిల్ లో కూడా ఎంతో సస్పెన్స్ ఉంది. దాన్ని మాత్రం తెరపై చూసే తెలుసుకోవాలి.