విజయ్ దేవరకొండ హీరోగా వస్తున్న తాజా చిత్రం వరల్డ్ ఫేమస్ లవర్. ఫిబ్రవరి 14న విడుదల కానున్న ఈ సినిమాపై మొదట పెద్దగా అంచనాలు లేకపోయినా థియేట్రికల్ ట్రైలర్ తో పరిస్థితిలో మార్పు వచ్చింది. దీనిపై నెమ్మదిగా బజ్ ఏర్పడింది. ఈ సినిమాలో మొత్తంగా నలుగురు హీరోయిన్లు నటించారు. రాశి ఖన్నా, క్యాథెరిన్, ఇజబెల్, ఐశ్వర్య రాజేష్ లు హీరోయిన్లుగా నటించగా అందరిలోకీ రాశి ఎక్కువగా హైలైట్ అవుతోంది. ఇటీవలే మీడియాతో ముచ్చటించిన రాశి.. విజయ్ దేవరకొండ గురించి ఆసక్తికర వ్యాఖ్యలు చేసింది.
విజయ్ దేవరకొండ ఇటీవలే చిత్ర థియేట్రికల్ లాంచ్ ఈవెంట్ లో మాట్లాడుతూ తన ఆలోచనలో మార్పు వచ్చిందని, ప్రేమ కథలు ఇకపై చేయనని, అవి ఇంక బోర్ కొట్టేశాయని ప్రకటించుకున్న విషయం తెల్సిందే. అయితే వరల్డ్ ఫేమస్ లవర్ మాత్రం తాను నటించిన ప్యూరెస్ట్ లవ్ స్టోరీ అని ప్రకటించాడు. విజయ్ దేవరకొండ కెరీర్ లో హిట్టైన సినిమాల్లో 90 శాతం ప్రేమకథలే. ఆ మిగిలిన 10 శాతంలో కూడా ప్రేమ కథ అంతర్లీనంగా ఉంటుంది. పైగా విజయ్ ను అమ్మాయిలు ఎక్కువగా ఇష్టపడడానికి కారణం ఆ లవ్ స్టోరీలు. లవర్ బాయ్ ఇమేజ్ తెచ్చుకున్న విజయ్ ను లవ్ స్టోరీల్లో కాకుండా వేరే జోనర్ సినిమాల్లో చూడడానికి ఇష్టపడతారు అన్నది అసలు ప్రశ్న.
ఇక ఇదే ప్రశ్న రాశిని అడిగితే.. విజయ్ లవ్ స్టోరీలు చేయకుండా ఉండలేడు అంటోంది. ఇప్పటికి అతనికి అలా అనిపించి ఉండొచ్చు కానీ ఫ్యూచర్ లో కచ్చితంగా లవ్ స్టోరీలు చేస్తాడు, అతణ్ణి అమ్మాయిలు లవ్ స్టోరీల్లో చూడటానికే ఇష్టపడతారు. పైగా ప్రేమకథలు ఎప్పటికీ అవుట్ డేట్ కావని ఆమె అభిప్రాయపడింది.
ఇక విజయ్ యాక్టింగ్ స్కిల్స్ గురించి మాట్లాడుతూ.. విజయ్ నటిస్తున్నప్పుడు అతని హావభావాలు మానిటర్ లో చూసి ఆశ్చర్యపోయేదాన్ని. ఇంత నటన ఎక్కడ నుండి వచ్చిందా అనుకునేదాన్ని. అయితే అతను థియేటర్ ఆర్టిస్ట్ అని తర్వాత తెలిసింది. విజయ్ చాలా గొప్ప పెర్ఫార్మర్.