స్టైలిష్ స్టార్ అల్లు అర్జున్ ఏడాదికి పైగా గ్యాప్ తీసుకుని వరసగా మూడు సినిమాలను లైన్లో పెట్టాడు. ముందుగా త్రివిక్రమ్ శ్రీనివాస్ తో ఉన్న కమిట్మెంట్ కారణంగా అల వైకుంఠపురములో చిత్రాన్ని ముందు మొదలుపెట్టాడు. ప్రస్తుతం ఈ చిత్ర షూటింగ్ శరవేగంగా సాగుతోంది. అసలు త్రివిక్రమ్ శ్రీనివాస్ తన కెరీర్ లోనే ఇంత స్పీడ్ గా షూట్ చేసి ఎరుగడు. అక్టోబర్ నెలాఖరుకే ఈ చిత్రంలో మేజర్ పార్ట్ షూటింగ్ పూర్తైపోయేలా ప్లాన్ చేస్తున్నారు.
ఇదిలా ఉంటే అల్లు అర్జున్ తర్వాత వేణు శ్రీరామ్ దర్శకత్వంలో ఐకాన్, సుకుమార్ ప్రాజెక్ట్ రెండూ ఒప్పుకున్నాడు. ముందుగా ఐకాన్ సెట్స్ పైకి వెళుతుందని వార్తలు వచ్చాయి. ఆ సినిమా షూటింగ్ సగం పూర్తయ్యాక సుకుమార్ సినిమాను కూడా మొదలుపెట్టి రెండు సినిమాలూ వచ్చే ఏడాది విడుదలయ్యే అల్లు అర్జున్ ప్లాన్ చేసుకున్నాడట.
కారణాలు తెలీదు కానీ ఇప్పుడు ఈ ప్లాన్ లో మార్పులు వచ్చాయిట. ఐకాన్ కాకుండా ముందు సుకుమార్ సినిమాను మొదలుపెట్టి అది పూర్తయ్యాకే ఐకాన్ పట్టాలెక్కిస్తాడట. ప్రస్తుతం సుకుమార్ ప్రీ ప్రొడక్షన్ పనులను పూర్తి చేసే పనిలో ఉన్నాడు. డిసెంబర్ నుండి ఈ చిత్రం సెట్స్ పైకి వెళుతుంది.