నితిన్ కు హిట్ వచ్చి చాలా కాలమైంది. తను నటించిన గత మూడు సినిమాలు ప్లాప్ కావడంతో ఎలాగైనా హిట్ కొట్టాల్సిన పరిస్థితుల్లో పడ్డాడు. అయితే బౌన్స్ బ్యాక్ అవ్వడానికి భీష్మ సరైన సినిమాగా భావిస్తున్నాడు. వెంకీ కుడుముల ఈ చిత్రానికి దర్శకుడు. ఛలో సినిమాతో అందరినీ అలరించిన ఈ దర్శకుడి రెండో సినిమాపై అంచనాలు బాగానే ఉన్నాయి. అదే సమయంలో రొమాంటిక్ ఎంటర్టైనర్ గా ఈ చిత్రం తెరకెక్కుతోంది. ఇప్పటివరకూ వచ్చిన ప్రోమోలు, పాటలు సినిమాపై అంచనాలను పెంచుతూనే ఉన్నాయి.
ఈ సినిమా నుండి విడుదలైన సింగిల్స్ యాంతెం ఇప్పటికే ఎంత పెద్ద హిట్ అయిందో మనందరం చూసాం. పాట విడుదలైన దగ్గరనుండి ఎక్కడచూసినా ఈ సాంగ్ మార్మోగిపోతోంది. ఇప్పటికే ఈ పాట 6 మిలియన్ వ్యూస్ దాటి దూసుకుపోతోంది. ఇక భీష్మ నుండి రెండు రోజుల క్రితం విడుదలైన సరా సరి సాంగ్ కూడా శ్రోతలను విశేషంగా అలరిస్తోంది. మహతి స్వర సాగర్ అందించిన బాణీ అదిరిపోయింది. ఆహ్లాదకరమైన మెలోడీగా ఈ పాట నిలుస్తోంది. అలాగే శ్రీమణి అందించిన సాహిత్యం చాలా సింపుల్ గా, ఇట్టే నోటికి వచ్చేటట్టుగా ఉంది. అలాగే ఇప్పుడు హాట్ ఫామ్ లో ఉన్న అనురాగ్ కులకర్ణి ఈ పాటను అద్భుతంగా పాడాడు. “సరాసరి గుండెల్లో దించావే.. మరీ మరి మైకంలో ముంచావే” అన్న హుక్ లైన్ పాటకు ప్లస్ గా మారింది. మొత్తంగా భీష్మ నుండి మరో పాట కూడా సక్సెస్ఫుల్ గా దూసుకుపోతోంది. ఇప్పటికే 1 మిలియన్ వ్యూస్ దాటింది ఈ సాంగ్.
ప్రస్తుతం సినిమా చిత్రీకరణ చివరి దశలో ఉంది. మరోవైపు నిర్మాణాంతర కార్యక్రమాలు కూడా జోరందుకున్నాయి. నితిన్ సరసన రష్మిక హీరోయిన్ గా నటిస్తున్న ఈ సినిమా ఫిబ్రవరి 21న విడుదలకు సన్నద్ధమవుతోంది. మరి ఈ సినిమాతో నితిన్ మళ్ళీ హిట్ ట్రాక్ పట్టాలని ఆశిద్దాం.
