వెండితెరపై తనదైన అల్లరితో సినీ ప్రియుల్ని కడుపుబ్బా నవ్విస్తుంటారు హీరో అల్లరి నరేష్. గత కొంత కాలంగా కామెడీ చిత్రాల్లో నటిస్తూ ఆకట్టుకుంటున్న ఆయన తాజాగా తన పంథా మార్చుకున్నారు. `నేను` తరహాలో సీరియస్ మూవీ `నాంది`తో ప్రేక్షకుల ముందుకు రాబోతున్నారు. విజయ్ కనకమేడల దర్శకత్వంలో వేగేశ్న సతీష్ ఈ చిత్రాన్ని నిర్మిస్తున్నారు. నవమి హీరోయిన్గా పరిచయం అవుతున్న ఈ చిత్రంలో అల్లరి నరేష్ ఏ తప్పు చేయని ట్రయల్ ఖైదీగా కనిపించనున్నారు.
ఈ చిత్రం ఈ నెల 19న ప్రేక్షకుల ముందుకు రానుంది. ఇటీవల విడుదల చేసిన ఈ చిత్ర టీజర్, ఫస్ట్ లుక్ పోస్టర్స్ ఈ మూవీపై భారీ అంచనాల్ని పెంచేసింది. ఈ మూవీకి సంబంధించిన కొన్ని సన్నివేశాల్లో హీరో అల్లరి నరేష్ అర్థ్ర నగ్నంగా నటించిన దృశ్యాలు ఒళ్లు గగుర్పొడిచేలా వున్నాయి. ఈ మూవీతో ఆయనకు అవార్డు గ్యారెంటీ అంటున్నారు.
ఇదిలా వుంటే ఈ మూవీతో సుమంత్ పోటీపడుతున్నారు. ఆయన నటిస్తున్న క్రైమ్ థ్రిల్లర్ `కపటధారి`. ప్రదీప్ కృష్ణమూర్తి దర్శకత్వం వహించారు. నందితా శ్వేతా హీరోయిన్గా నటిస్తున్న ఈ మూవీలో వరలక్ష్మీ శరత్కుమార్ , నాజర్, ప్రియదర్శి కీలక పాత్రల్లో నటిస్తున్నారు. ఓ చిన్నారి హత్య మిస్టరీ నేపథ్యంలో ఆద్యంతం ఆసక్తికరంగా సాగే చిత్రమిది.