థియేటర్లు మూతపడి దాదాపు తొమ్మిది నెలలవుతోంది. తాజాగా లాక్డౌన్ నిబంధనలు సడలించడంతో థియేటర్లు ఒక్కొక్కటిగా తెరుచుకుంటున్నాయి. అయితే థియేటర్లు రీఓపెన్ అయితే అవుతున్నాయి కానీ థియేటర్లకి రావడానికి జనాలు మాత్రం ఆసక్తిని చూపించడం లేదు. తాజాగా విడుదలైన `కరోనా వైరస్`, హాలీవుడ్ ఫిల్మ్ `టెనెట్` చిత్రాలకు ఆశించిన స్థాయిలో ప్రేక్షకుల నుంచి స్పందన కరువైంది. దీంతో ప్రేక్షకుల్ని ఆశించిన స్థాయిలో థియేటర్లకి రప్పించాలంటే స్టార్ సినిమాల్ని రిలీజ్ చేయాల్సందే అన్న టాక్ మొదలైంది.
ఈ నేపథ్యంలో మేగామేనల్లుడు సాయిధరమ్తేజ్ నటించిన `సోలో బ్రతుకే సోబెటర్` థియేటర్లలోకి రాబోతోంది. గత తొమ్మిది నెలలుగా విడుదల వాయిదాపడుతూ వస్తున్న ఈ మూవీ ఈ నెల 25న క్రిస్మస్ కానుకగా థియేటర్లలో విడుదల కాబోతోంది. ఇటీవలే సాంగ్ టీజర్ని రిలీజ్ చేశారు. కానీ ఆడియన్స్లో మాత్రం ఇంకా నమ్మకం కుదరడం లేదు. తాజాగా ఈ మూవీ విడుదలవుతున్న థియేటర్ల లిస్ట్ని చిత్ర బృందం విడుదల చేసింది.
దీనితో పాటు శనివారం ఈ మూవీ థియేట్రికల్ ట్రైలర్ ని రిలీజ్ చేయడంతో ఆడియన్స్లో ఈ మూవీపై పూర్తి స్థాయిలో నమ్మకం ఏర్పడినట్టు తెలుస్తోంది. ప్రస్తుతం సోషల్ మీడియాలో ఈ మూవీకి సంబఃధించిన థియేటర్స్ లిస్ట్ పోస్టర్ వైరల్ అవుతోంది. ఈ మూవీ రిలీజ్ కోసం ఇండస్ట్రీ వర్గాలన్నీ ఆసక్తిగా ఎదురుచూస్తున్నాయి. ఈ మూవీతో 50 శాతం కోవిడ్ నిబంధనల ప్రకారం ఫుల్ అయితే టాలీవుడ్కు కొత్త కళ మొదలైనట్టే అని చర్చనడుస్తోంది. ఏం జరగబోతోందన్నది తెలియాలంటే ఈ నెల 25 వరకు వేచి చూడాల్సిందే.