నిన్న ఎక్కడనుండి పుట్టుకొచ్చిందో తెలీదు కానీ సూపర్ స్టార్ మహేష్ బాబు 27వ చిత్రం కెజిఎఫ్ దర్శకుడు ప్రశాంత్ నీల్ తో ఉంటుందని వార్తలు మొదలయ్యాయి. ఈ వార్తలు ఏ రేంజ్ లో వచ్చాయంటే ఇక ఈ కాంబో పక్కా అన్న తరహాలో రావడంతో మహేష్ ఫ్యాన్స్ ఆనందంగా సోషల్ మీడియాలో షేర్ చేసుకుని సంబరాలు చేసేసుకున్నారు. ప్రస్తుతం సూపర్ స్టార్ మహేష్ బాబు తన 26వ చిత్రం సరిలేరు నీకెవ్వరు చిత్ర షూటింగ్ లో బిజీగా ఉన్నాడు. టాకీ పార్ట్ ఇప్పటికే పూర్తయింది. ఇక బ్యాలెన్స్ సాంగ్స్ షూట్ మాత్రం మిగిలుంది. అవి కూడా ఈ నెలాఖరుకి పూర్తవుతాయని తెలుస్తోంది. మాస్ జనాలను ఆకట్టుకోవడానికి ఈ చిత్రంలో ఏకంగా రెండు స్పెషల్ సాంగ్స్ ను సిద్ధం చేస్తున్నాడు అనిల్ రావిపూడి. జనవరి 12న ఈ చిత్రం విడుదల కానుంది.
సరిలేరు నీకెవ్వరు చిత్రం చివరి దశల్లో ఉన్నా కానీ మహేష్ బాబు ఇంకా తన తదుపరి చిత్రాన్ని ప్రకటించలేదు. ఎప్పుడూ ఒక సినిమా చివర్లో ఉండగానే తర్వాతి సినిమాను ప్రకటించే మహేష్ ఈసారి ఆ సంప్రదాయాన్ని పక్కనపెట్టేశాడు. సరిలేరు నీకెవ్వరు తర్వాత వెంటనే సినిమా చేయకుండా మరో మూడు నుండి నాలుగు నెలలు సినిమా నుండి బ్రేక్ తీసుకోనున్నట్లు వార్తలు వచ్చాయి. వీటిని మహేష్ భార్య నమ్రత ధృవీకరించింది కూడా. పిల్లలతో సమయం గడపడం, తర్వాతి సినిమా కోసం ప్రిపేర్ అవ్వడం కోసం ఈ బ్రేక్ ను వినియోగించుకుంటారని తెలిసింది. అంటే మహేష్ తన తర్వాతి సినిమాను మొదలుపెట్టడానికి కనీసం ఏప్రిల్ వరకూ సమయం పడుతుంది. సరిగ్గా ఈ పాయింట్ నుండే మహేష్ తర్వాతి సినిమా గురించి వార్తలు అల్లేశారు చాలా మంది. ఇప్పటికే కెజిఎఫ్ దర్శకుడు ప్రశాంత్ నీల్ తో మహేష్ టచ్ లో ఉన్న విషయాన్ని ఉపయోగించుకుని మహేష్ 27వ చిత్రం ప్రశాంత్ నీల్ దర్శకత్వంలో ఉంటుందని ప్రచారం జరిగింది. అంతవరకూ అయితే బాగానే ఉండేది.
కానీ ఈ చిత్రం ప్యాన్ ఇండియా లెవెల్లో తెరకెక్కుతోందని, హిందీ, తెలుగు, కన్నడ, తమిళ భాషల్లో ఈ చిత్రాన్ని తెరకెక్కించబోతున్నారన్నది ఈ వార్త సారాంశం. మార్చ్ లేదా ఏప్రిల్ నుండి ఈ చిత్రం పట్టాలెక్కబోతోందట. ఈ వార్తలు ప్రముఖ న్యూస్ పేపర్లలో కూడా ప్రచురితమయ్యాయి. అయితే రూమర్ రాయుళ్లు ఇక్కడ ఒక లాజిక్ ను మిస్ చేసారు. ప్రశాంత్ నీల్ ప్రస్తుతం కెజిఎఫ్ 2 చిత్ర షూటింగ్ పనులతో బిజీగా ఉన్నాడు. ఈ షూటింగ్ పూర్తి కావడానికే మార్చ్ నెల అవుతుంది. పోస్ట్ ప్రొడక్షన్, ప్రమోషన్స్ కోసం మరో మూడు నెలలు కచ్చితంగా అవసరమవుతాయి. అంటే అవన్నీ వదిలేసి మహేష్ సినిమాను మొదలుపెట్టేస్తాడా?
ప్రశాంత్ నీల్ తో మహేష్ సినిమా ఉంటుంది, కాకపోతే అది మహేష్ 27వ చిత్రం కాకుండా 28వ చిత్రంగా తెరకెక్కవచ్చు. ప్రశాంత్ నీల్ కంటే ముందు వంశీ పైడిపల్లితో సినిమా చేసే అవకాశముంది. అదీ మ్యాటరు.