యువ హీరో సందీప్ కిషన్ తెలుగుతో పాటు తమిళంలో కూడా సినిమాలు చేస్తున్నాడు. అయితే తమిళంలో సందీప్ కిషన్ చేసిన చిత్రమొకటి విడుదలకు నోచుకోలేక ఆగిపోయింది. ఆ చిత్రమే నరకాసురన్ . సందీప్ కిషన్ తో పాటు అరవింద్ స్వామి, శ్రియ వంటి వారు కీలక పాత్రలు పోషించారు. ఈ చిత్రం పూర్తై దాదాపు మూడేళ్లు కావొస్తోంది.
16 వంటి చిత్రంతో దర్శకుడిగా అరంగేట్రం చేసి అందరి దృష్టిని తన వైపుకి తిప్పుకున్న కార్తిక్ నరేన్ ఈ చిత్రాన్ని తెరకెక్కించాడు. ప్రముఖ దర్శకుడు గౌతమ్ మీనన్ ఈ చిత్రాన్ని నిర్మించాడు. అయితే గౌతమ్ మీనన్ కు ఉన్న ఆర్ధిక ఇబ్బందుల కారణంగా నరకాసురన్ విడుదలకు నోచుకోలేదు.
అయితే తాజా సమాచారం ప్రకారం ఈ చిత్రాన్ని డైరెక్ట్ గా ఓటిటిలో విడుదల చేస్తున్నారు. సోనీ లివ్ లో ఈ చిత్రం విడుదల కాబోతోంది. ఈ సినిమాను తెలుగులో నరకాసురుడు పేరుతో విడుదల చేస్తున్నారు. అయితే ఎప్పుడు విడుదల చేస్తారు అన్నది మరి కొద్ది రోజుల్లో తేలిపోతుంది.