సూపర్ స్టార్ మహేష్ బాబు హీరోగా ప్రకటించిన తాజా చిత్రం సర్కారు వారి పాట. పరశురామ్ దర్శకత్వంలో ఈ సినిమా తెరకెక్కనుంది. మే 31న ఈ సినిమాను ప్రకటించారు. సెప్టెంబర్ నుండి షూటింగ్ మొదలయ్యే అవకాశముంది. ప్రస్తుతం ప్రీ ప్రొడక్షన్ పనులు శరవేగంగా జరుగుతున్నాయి. ఇప్పటికే స్క్రిప్ట్ సిద్ధమైపోగా పరశురామ్ కాస్ట్, క్రూ ను తీసుకునే పనిలో ఉన్నాడు. ఆగష్టుకల్లా ప్రీ ప్రొడక్షన్ పనులను ఓ కొలిక్కి తీసుకురావాలని నిర్ణయం తీసుకున్నాడు. ప్రస్తుతం ఉన్న పరిస్థితుల ఆధారంగా ముందుగా పరిమిత సంఖ్యలో షూటింగ్స్ చేసుకోవడానికి షెడ్యూల్స్ ను మార్పు చేస్తున్నాడు.
ఇక ఈ సినిమా గురించి మాట్లాడుతూ ఒక సామజిక అంశంపై చర్చిస్తూనే పూర్తి స్థాయి కమర్షియల్ అంశాలున్న చిత్రం ఇదని తెలిపాడు. ఈ సినిమా షూటింగ్ కోసం ఎదురుచూస్తున్నానని తెలిపాడు. ఇక ఈ సినిమాలో మహేష్ రోల్ ఇదేనంటూ ఒక సరికొత్త వార్త మొదలైంది.
ఈ చిత్రంలో మహేష్ బ్యాంక్ మేనేజర్ కొడుకు పాత్రలో కనిపించనున్నాడట. ఒక భారీ స్కామ్ చేసి వేలాది కోట్లు ఎగవేసి తప్పించుకుని తిరుగుతున్న ఒక బడా వ్యాపారవేత్త ఆట కట్టించి ఆ అప్పును ఎలా వసూలు చేయించాడన్నది ఈ చిత్ర కథాంశమట. మొదట్లో మహేష్ పాత్ర అల్లరి చిల్లరగా ఉన్నా తర్వాత బాధ్యత కల యువకుడిగా కనిపిస్తాడని సమాచారం.