సికింద్రాబాద్ ఆర్పీరోడ్లో ఆటోమోబైల్ వ్యాపారం చేస్తున్న వి. వెంకటరమణారెడ్డికి సినిమాలపై ఆసక్తి పెరిగింది. అదే ఆయనని డిస్ట్రిబ్యూటర్ ని చేసింది.. `దిల్` సినిమాతో దిల్ రాజుగా మార్చింది. అంతకు ముందు డిస్ట్రిబ్యూటర్గా నష్టాల్లో వున్న ఆయన కెరీర్ని మలుపు తిప్పిన చిత్రం `తొలి ప్రేమ`. పవన్కల్యాణ్ నటించిన ఈ సినిమా ఏ స్థాయి సంచలనాలు సృష్టించిందో అందరికి తెలిసిందే. అప్పుడే నిర్మాతగా మారితే పవన్కల్యాణ్తో సినిమా చేయాలనుకున్నారట.
అయితే అది ఎంత ప్రయత్నించినా దిల్ రాజుకు అందని ద్రాక్షే అవుతూ వచ్చింది. కొన్ని సార్లు దర్శకులు సెట్టయినా, సరైన కథ కుదరక, కథ కుదిరినా పవర్స్టార్ పవన్కల్యాణ్ వరుస ప్రాజెక్ట్లతో బిజీగా వుండటం వంటి కారణాలతో గత 20 ఏళ్లుగా దిల్ రాజు కల నెరవేరడం లేదు. ఎప్పటికప్పుడు వాయిదా పడుతూ వస్తూనే వుంది. అయితే తాజాగా పరిస్థితులు అనుకూలించాయి. దిల్రాజు గత 20 ఏళ్లకు పైగా ఎదురుచూస్తున్న కల ఎదురుగా వచ్చి బోనీకపూర్ రూపంలో తలుపుతట్టింది.
హిందీలో సంచలన విజయాన్ని సాధించిన `బద్లా` చిత్రాన్ని బోనీకపూర్ తమిళంలో `నేర్కొండ పార్వై` పేరుతో రీమేక్ చేసిన విషయం తెలిసిందే. అక్కడ కూడా సంచలన విజయాన్ని సాధించడంతో తెలుగులో పవన్కల్యాణ్ హీరోగా రీమేక్కు సన్నాహాలు చేస్తున్నారు. ఈ చిత్రానికి దిల్ రాజు కూడా భాగస్వామిగా వ్యవహరిస్తున్నారు. శ్రీరామ్ వేణు దర్శకత్వం వహించనున్న ఈ చిత్రానికి సంబంధించిన ఫార్మల్ పూజా కార్యక్రమాల్ని ఇటీవలే దిల్ రాజు ఆఫీస్లో పూర్తి చేశారు. జనవరి నుంచి రెగ్యులర్ షూటింగ్ ప్రారంభం కాబోతుండటంతో 20 ఏళ్లుగా ఎదురు చూసిన దిల్ రాజు కల `పింక్` రీమేక్తో నెరవేరుతోందని అంతా చెప్పుకుంటున్నారు.