సీరియళ్లు అంటే ఏడుపుగొట్టువి, ఎపిసోడ్లకు ఎపిసోడ్లు సాగతీస్తారు, కామెడీ ఉన్నా కానీ అది ఆరోగ్యవంతంగా ఉండదు అన్న అభిప్రాయాలు చాలా మంది జనాల్లో నాటుకుపోయాయి. సీరియల్స్ కు ఆదరణ ఎప్పుడూ బానే ఉంటుంది కానీ అవంటే ఏంటో చాలా మందికి చిన్న చూపు ఉంటుంది. అయితే అందరి చేత గౌరవం అందుకున్న సీరియల్స్ కూడా ఉన్నాయి. అందులో ప్రధానంగా ప్రస్తావించుకోవాల్సింది అమృతం గురించే. వీకెండ్స్ మాత్రమే వచ్చే ఈ అమృతం తెలుగు ప్రేక్షకులను ఎంతగానో అలరించింది. ఎక్కడా సాగతీత అనేది లేకుండా, జంధ్యాల తరహా హాస్యంతో అందరినీ కడుపుబ్బా నవ్వించింది అమృతం.
అమృతం సీరియల్స్ లోని ఆలోచనలు ఇప్పటికీ సరితూగుతుండడం విశేషంగానే చెప్పాలి. ఎంతోమంది ప్రతిభావంతులను ఈ సీరియల్ అందించింది. చంద్రశేఖర్ యేలేటి ఈ సీరియల్ ద్వారానే గుర్తింపు తెచ్చుకున్నాడు. హర్షవర్ధన్ గురించి తెల్సింది కూడా ఈ సీరియల్ ద్వారానే. అమృతం పాత్రలో నటించడమే కాకుండా చాలా ఎపిసోడ్లకు దర్శకత్వం కూడా చేసాడు. లిటిల్ సోల్జర్స్ వంటి అద్భుతమైన సినిమాను అందించిన గుణ్ణం గంగరాజు ఈ సీరియల్ ను నిర్మించాడు. అయితే సూపర్ సక్సెస్ తో దూసుకుపోతున్న అమృతం సీరియల్ ను ఎనిమిదేళ్ల తర్వాత ఆపేసారు. ఎపిసోడ్స్ కు ఆదరణ బాగున్నా కానీ ఆ స్థాయిలో రైటర్స్ ఎవరూ దొరక్కపోవడంతో అమృతం కు ఉన్న బ్రాండ్ ఇమేజ్ ను పోగొట్టడం ఇష్టం లేక ఆపేసారు. అమృతం, ఆంజనేయులు, సర్వం, అప్పాజీ వంటి పాత్రలు తెలుగు వారికి ఎప్పుడూ దగ్గరగానే ఉంటాయి.
అమృతం యూట్యూబ్ లో కూడా పెద్ద హిట్. ప్రతి ఎపిసోడ్ కు మిలియన్ ల సంఖ్యలో వ్యూస్ ఉంటాయి. ఇప్పుడు వాటిని జీ5 యాప్ లో పెడుతున్నారు. ఇదిలా ఉంటే ఇప్పుడు అమృతం పార్ట్ 2 ను అమృతం ద్వితీయం పేరుతో తీసుకురాబోతుండడం విశేషం. గుణ్ణం గంగరాజు సారధ్యంలో ఆయన కొడుకు సందీప్ గుణ్ణం తెరకెక్కించనున్న ఈ సెకండ్ పార్ట్ ప్రస్తుతం స్క్రిప్టింగ్ దశలో ఉంది. ఈ ఏడాదే ఎపిసోడ్స్ లైవ్ కాబోతున్నాయని అంటున్నారు. అయితే ఆంజనేయులు పాత్ర పోషించడానికి గుండు హనుమంతరావు ఇప్పుడు మన మధ్య లేరు. హర్షవర్ధన్ స్థాయి కూడా పెరిగింది. మరి ఈ పాత్రలకు ఎవరిని తీసుకుంటారో అన్నది ఆసక్తికరంగా మారింది.