స్టైలిష్ స్టార్ అల్లు అర్జున్.. నా పేరు సూర్య నా ఇల్లు ఇండియా సినిమా తర్వాత చాలా గ్యాప్ తీసుకున్నాడు. ఎలాంటి సినిమా చేయాలన్న విషయంలో సందిగ్దత ఎదుర్కొని చివరికి త్రివిక్రమ్ శ్రీనివాస్ దర్శకత్వంలో సినిమా చేయడానికి పచ్చ జెండా ఊపేసాడు. ఈ సినిమా షూటింగ్ ఇప్పటికే ముగించుకుని ఇప్పుడు పోస్ట్ ప్రొడక్షన్ కార్యక్రమాల్లో ఉన్న విషయం తెల్సిందే. అల వైకుంఠపురములో జనవరి 12న విడుదల ముస్తాబవుతోంది. ఇదిలా ఉంటే దాదాపు ఏడాది పాటు సినిమా మొదలుపెట్టకుండా జాప్యం చేసిన అల్లు అర్జున్ ఇప్పుడు వరసగా సినిమాలను లైన్లో పెడుతున్నాడు.
అల వైకుంఠపురములో షూటింగ్ లో ఉన్న సమయంలోనే బన్నీ రెండు సినిమాలను ప్రకటించాడు. ఒకటి సుకుమార్ దర్శకత్వంలో సినిమా, మరొకటి వేణు శ్రీరామ్ దర్శకత్వంలో ఐకాన్. ముందుగా సుకుమార్ సినిమా షూటింగ్ మొదలవుతుంది. ప్రీ ప్రొడక్షన్ పనులు ఇప్పటికే తుదిదశకు చేరుకున్న క్రమంలో ఫిబ్రవరి నుండి ఈ సినిమా షూటింగ్ మొదలవ్వడం ఖాయంగా కనిపిస్తోంది. దీని తర్వాత ఐకాన్ షూటింగ్ మొదలయ్యే అవకాశాలున్నాయి.
ఇదిలా ఉంటే బన్నీ అల వైకుంఠపురములో పూర్తైన వెంటనే మరో సినిమాను కన్ఫర్మ్ చేయాలనుకుంటున్నాడట. అందుకే దర్శకుల దగ్గర కథలు వింటున్నట్లు అల్లు అర్జున్ దగ్గర సన్నిహితులు చెబుతున్నారు. ఏ ఆర్ మురుగదాస్ సహా మరికొంత మంది దర్శకుల దగ్గర కథలు వింటున్నది బన్నీ. వారిలో హరీష్ శంకర్ కూడా ఉన్నట్లు తెలుస్తోంది.
మురుగదాస్ ఇటీవలే తెలుగు హీరోల గురించి స్పందించాడు. దర్బార్ సినిమా ప్రమోషన్స్ లో మాట్లాడుతూ తాను తెలుగు హీరోల ఇమేజ్ ను తప్పుగా అర్ధం చేసుకున్నానని, ఇక్కడ ఆడియన్స్ పల్స్ ను పట్టుకోవడంలో విఫలమయ్యానని, త్వరలోనే తెలుగు ప్రేక్షకులను అర్ధం చేసుకుంటానని అన్నాడు. దీని వెనుక అర్ధం అల్లు అర్జున్ తో సినిమా చేయనున్నట్లేనని ఇప్పుడు కొంత మంది వాదిస్తున్నారు. ఇద్దరూ హైదరాబాద్ లో ఇటీవలే కలవడం ఈ వ్యాఖ్యలకు బలం చేకూర్చింది. మరి మురుగదాస్, హరీష్ శంకర్ లలో బన్నీ అవకాశం ఎవరికి ఇస్తాడో లేదా మరో దర్శకుడితో చేయాలనుకుంటాడో తెలియాలంటే మరికొంత కాలం వెయిట్ చెయ్యక తప్పదు.